ಬೆಂಗಳೂರು: ದಲಿತರಿಗೆ ಭೂಮಿ  ನೀಡಬೇಕು ಹಾಗೂ ಪ್ರತಿಯೊಬ್ಬರ ಆಹಾರ ಹಕ್ಕನ್ನು ರಕ್ಷಿಸಬೇಕು ಎಂದು ಆಗ್ರಹಿಸಿ ದಲಿತರ, ದಮನಿತರ ಸ್ವಾಭಿಮಾನಿ ಹೋರಾಟ ಸಮಿತಿ ಹಮ್ಮಿಕೊಂಡಿರುವ ‘ಉಡುಪಿ ಚಲೋ’ ಜಾಥಾಕ್ಕೆ ಇಲ್ಲಿನ ಸ್ವಾತಂತ್ರ್ಯ ಉದ್ಯಾನದಲ್ಲಿ ಮಂಗಳವಾರ ಚಾಲನೆ ನೀಡಲಾಯಿತು. ದಲಿತರ ಮೇಲಿನ ದೌರ್ಜನ್ಯ, ಗೋಸಂರಕ್ಷಣೆ ಹೆಸರಿನಲ್ಲಿ ನಡೆಯುತ್ತಿರುವ ಕ್ರೌರ್ಯ ಹಾಗೂ ಆಹಾರದ ಹಕ್ಕನ್ನು ಕಿತ್ತುಕೊಳ್ಳುವ ಪ್ರಯತ್ನಗಳ ಕರಾಳ ಮುಖಗಳನ್ನು ಅನಾವರಣಗೊಳಿಸುವ ಚಿತ್ರಕಲೆ, ಬೀದಿ ನಾಟಕ, ಜಂಬೆ ವಾದನ, ನಗಾರಿ ಬಡಿತ, ಹಾಡು, ಕುಣಿತಗಳ ಮೂಲಕ ಉತ್ಸಾಹ  ತುಂಬಿಕೊಂಡ  ಹೋರಾಟಗಾರರು  ಉಡುಪಿಯತ್ತ  ಪ್ರಯಾಣ ಬೆಳೆಸಿದರು. ಪಂಜು ಬೆಳಗಿಸುವ ಮೂಲಕ ಜಾಥಾಕ್ಕೆ ಚಾಲನೆ ನೀಡಿದ, ಬಿಬಿಎಂಪಿಯ ಗುತ್ತಿಗೆ ಪೌರ ಕಾರ್ಮಿಕರಾದ ಆಂಜನಮ್ಮ, ‘ದಲಿತರ, ಹೆಣ್ಣುಮಕ್ಕಳ ಉದ್ಧಾರ ಮಾಡುತ್ತೇವೆ ಎಂದು ಎಲ್ಲರೂ ಹೇಳುತ್ತಾರೆ. ಆದರೆ, ಈ ಭರವಸೆಗಳು ಒಂದೂ ಈಡೇರಿಲ್ಲ. ದಲಿತರ ಮೇಲಿನ ಅನ್ಯಾಯ ಈಗಲೂ ಮುಂದುವರಿದಿದೆ. ಈ ಹೋರಾಟದ ಮೂಲಕವಾದರೂ ದಲಿತರ ಬವಣೆಗಳಿಗೆ ಮುಕ್ತಿ ಸಿಗಲಿ’ ಎಂದರು.