ಇಂದು ದೇವನೂರು ಮಹಾದೇವ ಅವರ ಕಿರು ಪುಸ್ತಕ “ ಆರ್ ಎಸ್ ಎಸ್ – ಆಳ ಮತ್ತು ಅಗಲ”, ಕರ್ನಾಟಕಾದ್ಯಂತ ವೈಚಾರಿಕ ಅಲೆಯನ್ನೇ ಎಬ್ಬಿಸಿದೆ. ಇದು ತನ್ನ ವಿಶಿಷ್ಟ ವಿಶ್ಲೇಷಣೆಯಿಂದ ಬಿಜೆಪಿ- ಆರ್ ಎಸ್ ಎಸ್ ನ ವಿರುದ್ಧ ಪ್ರತಿರೋಧವನ್ನು ಕಟ್ಟಲು ಕಾರ್ಯಕರ್ತರು ಮತ್ತು ಜನತೆಗೆ ಕರೆ ನೀಡುತ್ತಿದೆ . ಹಾಲಿ ಕರ್ನಾಟಕದಲ್ಲಿ ಹಿಂದುತ್ವ ಶಕ್ತಿಗಳ ಆಕ್ರಮಣಕಾರಿ ಅಲೆ ತನ್ನ ಪರಾಕಾಷ್ಠೆ ಯಲ್ಲಿ ಇದೆ. ಅದು ಹಿಜಾಬ್, ಅಜಾನ್, ಪಠ್ಯ ಪುಸ್ತಕಗಳು ಮುಂತಾಗಿ ಅನೇಕ ವಿಷಯಗಳನ್ನು ಎತ್ತಿಕೊಂಡು ಸತತ ಮುಸ್ಲಿಂ ವಿರೋಧಿ ದ್ವೇಷದ ಕೆಲಸಗಳನ್ನು ಮಾಡುತ್ತಿದೆ. ಇತ್ತೀಚಿಗೆ ಕರ್ನಾಟಕ ಸರ್ಕಾರ ಒಂದು ಸುಗ್ರೀವಾಜ್ಞೆ , ”ಧಾರ್ಮಿಕ ಸ್ವಾತಂತ್ರ್ಯದ ರಕ್ಷಣೆ ಮಸೂದೆ 2022”, ಎಂಬ ಹೆಸರಿನಲ್ಲಿ ತಂದಿದೆ. ಇದರಲ್ಲಿ ಧರ್ಮ ಪರಿವರ್ತನೆ ಯನ್ನು ಒಂದು ಶಿಕ್ಷಾರ್ಹ ಅಪರಾಧವನ್ನಾಗಿ ಪರಿಗಣಿಸಲಾಗಿದೆ. ಒಟ್ಟಾರೆ ಕರ್ನಾಟಕವು ಹಿಂದುತ್ವ ರಾಜಕೀಯದ ಪ್ರಯೋಗ ಶಾಲೆಯಾಗಿದೆ.

ದೇವನೂರು ಮಹದೇವ ( ದೇ ಮ ) ಅತ್ಯಂತ ಗಮನಾರ್ಹ ದಲಿತ ಲೇಖಕ ಆಗಿದ್ದು, 7೦ ರ ದಶಕದಲ್ಲಿ ಹೊರಹೊಮ್ಮಿದ ತಲೆಮಾರಿನವರಾಗಿದ್ದಾರೆ. ದಲಿತರ ಅರಿವಿನ ಆಸ್ಫೋಟದಿಂದ ಹೊರಹೊಮ್ಮಿದ ದಲಿತ ಸಂಘರ್ಷ ಸಂಮಿತಿಯ ಸಂಸ್ಥಾಪಕರಲ್ಲಿ ಒಬ್ಬರು. ಹಾಲಿ ಅವರು ಸ್ವರಾಜ್ ಪಕ್ಷದ ಕರ್ನಾಟಕ ಶಾಖೆಯ ಗೌರವಾಧ್ಯಕ್ಷರಾಗಿದ್ದಾರೆ. ಅವರಿಗೆ ಪದ್ಮಶ್ರೀ ಸನ್ಮಾನವನ್ನು ಕೇಂದ್ರ ಸರ್ಕಾರವು ನೀಡಿದೆ. ಅವರು ಕರ್ನಾಟಕದ ಸಾಕ್ಷಿ ಪ್ರಜ್ಞೆ . ಅವರ ಹಾಲಿ ಕಿರು ಹೊತ್ತಿಗೆಯನ್ನು ಈ ಸಂಧರ್ಭದಲ್ಲಿಯೇ ನೋಡಬೇಕು.

ಈ ಕಿರು ಹೊತ್ತಿಗೆ ಪುಟ್ಟದಾಗಿದ್ದು, 64 ಪುಟಗಳನ್ನು ಹೊಂದಿದ್ದು , ಅಂಗೈಯಲ್ಲಿ ಹಿಡಿಯಬಹುದಾಗಿದೆ. ದೇ ಮ ಅವರ ಈ ಹೊತ್ತಿಗೆಯ ವಿಚಾರಗಳನ್ನು ಸರಳವಾಗಿ ಹೇಳಲು ಇಲ್ಲಿ ಪ್ರಯತ್ನಿಸಲಾಗಿದೆ. ದೇ ಮ ಅವರು ತಮ್ಮ ಕೃತಿಯ ಉದ್ದೇಶ : ಆರ ಎಸ್ ಎಸ್ ಅನ್ನು ವಿಶ್ಲೇಷುವುದು ಮತ್ತು ಒಟ್ಟಾರೆ ಜನರನ್ನು ಎಚ್ಚರಿಸುವುದಾಗಿದೆ. ಇದನ್ನು ಅವರು ಆರ್ ಎಸ್ ಎಸ್ ನ ನೆಲೆ ಹಾಗೂ ಆತ್ಮವನ್ನು ನೋಡಲು ಪ್ರಾರಂಭಿಸುತ್ತಾರೆ. ಅವರು ಮುಖ್ಯವಾಗಿ ವಿ.ಡಿ.ಸಾವರ್ಕರ್, ಗುರೂಜಿ ಗೋಲ್ವಾಲ್ಕರ್ ಅವರ ಕೃತಿಗಳನ್ನು ಗಮನಿಸುತ್ತಾರೆ ಮತ್ತು ಅವರ ಪ್ರಕಾರ ಹೆಡ್ಗೆವಾರ್ ಆರ್ ಎಸ್ ಎಸ್ ನ ಸಿದ್ದಾಂತದ ಚಿಲುಮೆ.

ಗುರು ಗೋಲ್ವಾಲ್ಕರ್ ಅವರ ಪ್ರಕಾರ ಹಿಂದೂ ಸಮಾಜ ದೇವರ “ ವಿರಾಟ “ ಸ್ವರೂಪ. ಅದನ್ನು ಋಗ್ವೇದದ ಪುರುಷ ಸೂಕ್ತದಲ್ಲಿ ಉಲ್ಲೇಖಿಸಲಾಗಿದೆ. ಗುರೂಜಿ ಗೊಲ್ವಾಲ್ವಕರ್ ಪ್ರಕಾರ ಭಾರತದ ಸಂವಿಧಾನ “ ಮನು ಸ್ಮೃತಿ” ಆಗಬೇಕು. ಇದನ್ನು ಪ್ರಪ್ರಥಮವಾಗಿ ವಿ.ಡಿ. ಸಾವರ್ಕರ್ ಪ್ರತಿಪಾದಿಸಿದ್ದರು. ಅಂಬೇಡ್ಕರ್ ಅವರ ಸಂವಿಧಾನವನ್ನು ಎಲ್ಲೆಡೆಯಿಂದ ಚಿಂದಿ ಚಿಂದಿ ಗಳಿಂದ ಆರಿಸಿ ತಂದು ತೇಪೆ ಹಾಕಲಾಗಿದೆ. ಇನ್ನೂ ಒಕ್ಕೂಟ ವ್ಯವಸ್ಥೆಯು ಬಹಳ ಶಿಥಿಲವಾಗಿದ್ದು, ಅದನ್ನು ಏಕೀಕೃತ unitary ಪ್ರಭುತ್ವವನ್ನಾಗಿ ಮಾಡಬೇಕು. ಆರ್ ಎಸ್ ಎಸ್ ನ ಸ್ಪೂರ್ತಿಯ ನೆಲೆ: ಒಂದೇ ಬಾವುಟ, ಒಬ್ಬನೇ ನಾಯಕ , ಒಂದೇ ಸಿದ್ದಾಂತ. ಗುರೂಜಿ ಪ್ರಕಾರ ಜರ್ಮನಿಯ ಜನಾ೦ಗೀಯ ವಾದವು “ ಜನಾಂಗೀಯ ಹೆಮ್ಮೆ” ಯ ಆಧರ್ಶ.

ಗೋಲ್ವಾಳ್ಕರ್ ಕೃತಿ, ಚಿಂತನ ಗಂಗಾ, ಮೂರು ಪ್ರಮುಖ ವಿಚಾರಗಳನ್ನು ಹೊಂದಿದೆ. ಮೊದಲನೆಯದಾಗಿ: ಋಗ್ವೇದದ ಪುರುಷ ಸೂಕ್ತ , ದೇವರ ಅವತಾರ ಮತ್ತು ಭಗದ್ಗೀತೆಯ ಪ್ರಚಾರ . ಎರಡನೆಯದಾಗಿ , ಚಾತುರ್ವರ್ಣ ವನ್ನು ಉಳಿಸಿಕೊಳ್ಳುವುದು ಮತ್ತು ಅಂಬೇಡ್ಕರ್ ಅವರ ಸಂವಿಧಾನವನ್ನು ತಿರಸ್ಕರಿಸುವುದು. ಈ ಮೂಲಕ ದೇಶದ ಒಕ್ಕೊಟ ವ್ಯವಸ್ಥೆಯನ್ನು ನಾಶ ಮಾಡುವು ವುದು. ಸಂಸ್ಕೃತವನ್ನು ರಾಷ್ಟ್ರ ಭಾಷೆಯನ್ನಾಗಿ ಮಾಡಲು ಹಿಂದಿಯನ್ನು ಉತ್ತೇಜಿಸುವುದು. ಮೂರನೆಯದಾಗಿ ಆರ್ಯನ್ ಸರ್ವೋಚ್ಚತೆಯನ್ನು ವೈಭವೀಕರಿಸುವುದು. ಜಾತಿ ಮತ್ತು ಪಂಥಗಳನ್ನು ಹಿಂದೂ ವಾದದಲ್ಲಿ ಅರಗಿಸಿ ಕೊಳ್ಳುವುದು. ಮುಸಲ್ಮಾನರು ಮತ್ತು ಕ್ರೈಸ್ತರು ಬ್ರಾಹ್ಮಣೇತರರು ಮತ್ತು ಹಿಂದೂ ಧರ್ಮದ ಚೌಕಟ್ಟಿನಲ್ಲಿ ಬರುವುದಿಲ್ಲ.

ದೇಮ ಅವರು,..’ ಆರ್ ಎಸ್ ಎಸ್, ಟಿಪ್ಪು ಸುಲ್ತಾನನ ಬಗ್ಗೆ ಸುಳ್ಳುಗಳನ್ನು ಹಬ್ಬಿಸುತ್ತಾ, ಆತನು ಹಿಂದೂಗಳ ವಿರೋಧಿ ಎಂದು ಬಣ್ಣಿಸುತ್ತಿದೆ. ಆರ್ ಎಸ್ ಎಸ್ ಈ ದೇಶದಲ್ಲಿ ಗೃಹ ಯುದ್ದ ವನ್ನು ಆಶಿಸುತ್ತದೆ’ ಎನ್ನುತ್ತಾರೆ..ಇಂತಹ ಪರಿಸ್ಥಿತಿಯಲ್ಲಿ ಬಹುಸಂಖ್ಯಾತ ಹಿಂದೂಗಳು ಮಾತನಾಡಬೇಕೆಂದು ಕರೆ ನೀಡುತ್ತಾರೆ. ಬಿಜೆಪಿ- ಆರ್ ಎಸ್ ಎಸ್ ಕೇಂದ್ರ ಸರಕಾರ ಮತ್ತು ಅನೇಕ ರಾಜ್ಯಗಳಲ್ಲಿ ಅಧಿಕಾರದಲ್ಲಿದೆ. ಅನೇಕ ವರ್ಷಗಳಲ್ಲಿ ಹಿಂದೆ 1977 ರಲ್ಲಿ ಜನತಾ ಪಕ್ಷದೊಳಗೆ ಇವರು ನುಸಿಳಿಕೊಂಡರು. ಆಗ ಅವರು ತಮ್ಮ ದ್ವಿಸದಸ್ಯತ್ವವನ್ನು ಬಿಡುವುದಾಗಿ ಆಶ್ವಾಸನೆ ನೀಡಿದ್ದರು. ನಂತರದಲ್ಲಿ ಅವರ ವ್ಯಾಪಕತೆ ಹೆಚ್ಚಿತು. ಅವರು ಪಾಕಿಸ್ತಾನ ವನ್ನು ಶಾಶ್ವತ ಶತ್ರು ಎಂದು ಬಿಂಬಿಸುತ್ತಾ ಸ್ಥಳೀಯ ಮುಸಲ್ಮಾನರ ಮೇಲೆ ದ್ವೇಷ ಸಾಧಿಸುತ್ತಿದ್ದಾರೆ. ಇದರಿಂದ ಅವರು ಬಹುತ್ವದ ಭಾರತವನ್ನು ಛಿದ್ರಗೊಳಿಸುತ್ತಿದ್ದಾರೆ ನರೇಂದ್ರ ಮೋದಿ ಸರ್ಕಾರ ಅನೇಕ ಆಶ್ವಾಸನೆಗಳನ್ನು ನೀಡಿತ್ತು. ಆದರೆ ಅದು ಅದರ ಬಹುಪಾಲನ್ನು ಈಡೇರಿಸಿಲ್ಲ. ನೋಟಿನ ಅಮಾನ್ಯೀಕರಣದಿಂದಾಗಿ ಜನತೆಗೆ ಕಡು ಕಷ್ಟ ಉಂಟಾಯಿತು . ಮುಖ್ಯವಾದ ಕೈಗಾರಿಕಾ ರಂಗಗಳ ನ್ನು ಖಾಸಗೀಕರಣ ಮಾಡುವುದು ಮತ್ತು ಏರುತ್ತಿರುವ ಬೆಲೆ ಏರಿಕೆಗಳು ಮಾತ್ರವೇ ಮೋದಿ ಸರ್ಕಾರದ ಸಾಧನೆಗಳು,. ಇಂತಹವರನ್ನು ಆಯ್ಕೆ ಮಾಡಿದ್ದಕ್ಕೆ ಜನತೆ ವಿಷಾದಿಸುತ್ತಿದ್ದಾರೆ.

ಭಾರತದ ಕೇಂದ್ರ ಸರ್ಕಾರವು ಅಧಿಕಾರದಲ್ಲಿದ್ದರೂ, ಕೆಲವೇ ಕೈಗಾರಿಕಾ ಕುಟುಂಬಗಳು ಭಾರತ ದೇಶವನ್ನೇ ಸಂವಿಧಾನದ ಹೊರತಾಗಿ ಹತೋಟಿ ಮಾಡುತ್ತಿವೆ. ಸರ್ಕಾರದ ಎಲ್ಲಾ ನೀತಿಗಳನ್ನು ಆರ್ ಎಸ್ ಎಸ್ ನಿರ್ಧರಿಸುತ್ತದೆ. ಮೋದಿ ಉತ್ಸವ ಮೂರ್ತಿ ಮಾತ್ರ. ಮೋದಿ ಅವರು ತಮ್ಮ ವಾಕ್ಝರಿಯಿಂದ ಹಾಲಿ ಸಮಸ್ಯೆಗಳಿಂದ ಜನರ ಗಮನವನ್ನು ಬೇರೆಡೆಗೆ ತಿರುಗಿಸಬಲ್ಲರು. ಮೋದಿಗೆ ನಿಜವಾದ ಅಧಿಕಾರ ಇದ್ದರೆ ಅನೇಕ ಮೂಲಭೂತ ಸಮಸ್ಯೆ ಯೆಗಳನ್ನು ಬಗೆಹರಿಸಬಹುದಾಗಿತ್ತು. ಕರೋನ ಕಾಲದಲ್ಲಿ ಜನತೆ ಬಹಳ ಸಂಕಷ್ಟಕ್ಕೆ ಈಡಾದರು. ಆದರೆ ಈ ಸಮಯದಲ್ಲಿ ಅದಾನೀ – ಅಂಬಾನಿಯವರ ಸಂಪತ್ತು ಅಗಾಧವಾಗಿ ವೃದ್ಧಿಸಿತು. ಶ್ರೀಮಂತರು ಹೆಚ್ಚು ಶ್ರೀಮಂತರಾಗುತ್ತಿದ್ದಾರೆ. ಮನುಸ್ಮೃತಿಯನ್ನು ಜಾರಿಗೊಳಿಸಲು ಆರ್ ಎಸ್ ಎಸ್ ಎಲ್ಲಾ ಕುತಂತ್ರಗಳನ್ನು ಮಾಡುತ್ತಿದೆ. ಅವರು ದೇಶದ ಒಕ್ಕೂಟ ವ್ಯವಸ್ಥೆ ಯ ವಿರೋಧಿಗಳು. ಶಿಕ್ಷಣ ವ್ಯವಸ್ಥೆಯನ್ನು ಸಂಪೂರ್ಣ ಬದಲಾಯಿಸಲು ಹೊರಟಿದ್ದಾರೆ. ಒಂದು ಬಾಷೆ, ಒಂದೇ ಧರ್ಮದ ಆಧಿಪತ್ಯ ಮತ್ತು ಒಂದೇ ನಾಯಕ ಎಂಬುದೇ ಆರ್ ಎಸ್ ಎಸ್ ನ ರಣ ನೀತಿ.

ಬ್ರಿಟಿಷರಿಗೆ ಕ್ಷಮಾಪಣಾ ಪತ್ರ ಬರೆದು ಕೊಟ್ಟ ವಿ.ಡಿ. ಸಾವರ್ಕರ್ ನನ್ನು “ ವೀರ” ಎಂದು ಬಿಂಬಿಸಲಾಗುತ್ತಿದೆ. ಅವರು ಆರ್ಯನ್ ಜನಾಂಗದ ಶ್ರೇಷ್ಠತೆಯನ್ನು ಎತ್ತಿ ಹಿಡಿಯುತ್ತಿದ್ದಾರೆ, ಹಾಲಿ ನಡೆಯುತ್ತಿರುವ ಖಾಸಗೀಕರಣದ ಭರಾಟೆಯಲ್ಲಿ ಶೂದ್ರರು ನಿರುದ್ಯೋಗಕ್ಕೆ ಈಡಾಗುತ್ತಿದ್ದಾರೆ. ದಲಿತರು ಮತ್ತು ಮಹಿಳೆಯರು ಸೇರಿದಂತೆ ಎಲ್ಲ ಜನತೆಯ ಹಕ್ಕುಗಳ ಜತೆ ಆಟವಾಡುತ್ತಿದ್ದಾರೆ. ಕೊನೆಯದಾಗಿ ದೇಮ ಈಗ ನಾವೇನು ಮಾಡಬೇಕು ಎಂಬುದನ್ನೂ ಸೂಚಿಸಿದ್ದಾರೆ. ಇಡೀ ಆರ್ ಎಸ್ ಎಸ್ ಸಂತಾನ ಸತತವಾಗಿ ದುಡಿಯುತ್ತಿದ್ದಾರೆ, ಅವರಲ್ಲಿ ಯಾವುದೇ ಒಡಕಿಲ್ಲ. ಇದರ ಮರ್ಮ ಅವರ ಭೂತ ಕಾಲದ ಹಿನ್ನಡೆಯ ನಂಬಿಕೆಗಳು (retrograde beleifs in the past). ಅವೇನೆಂದರೆ: ಚಾತುರ್ವರ್ಣ , ಮನು ಧರ್ಮ ಶಾಸ್ತ್ರ ,ಆರ್ಯನ್ ಶ್ರೇಷ್ಠ ತಳಿ , ಭಾರತ ಸಂವಿಧಾನದ ಧ್ವಂಸ ಮಾತ್ರ.. ಈ ನಂಬಿಕೆಗಳು ಆರ್ ಎಸ್ ಎಸ್ ನ ಉಸಿರಾಟಕ್ಕೆ ಕಸಿ ಮಾಡುತ್ತದೆ, ಅದಕ್ಕಾಗಿ ಅದು ವಿವೇಚನಾಶಕ್ತಿಯನ್ನ ನಾಶ ಮಾಡುತ್ತದೆ. ಇವುಗಳಿಂದಾಗಿ ಮೇಲಿನಿಂದ ಬರುವ ಅಪ್ಪಣೆಗಳನ್ನು ಕಾರ್ಯಕರ್ತರು ಸಮ್ಮೋಹನಕ್ಕೆ ಒಳಗಾದಂತೆ ಜಾರಿ ಮಾಡುತ್ತಾರೆ.

ಇಂತಹ ಸಂಧರ್ಭದಲ್ಲಿ ಸಮಾಜವನ್ನು ಮುನ್ನಡೆಸುವವರಿಗೆ ಹೆಚ್ಚಿನ ಜವಾಬ್ದಾರೀ ಇರುತ್ತದೆ. ಇಂದಿನ ತುರ್ತು ಏನೆಂದರೆ, ಭೂತಕಾಲದ ಚಾತುರ್ವರ್ಣವನ್ನು ಪ್ರತಿಪಾದಿಸುವ ಈ ಹಿನ್ನಡೆ ಗುಂಪುಗಳ ನಾನಾ ವೇಷಗಳನ್ನು ಕಳೆಚಿ ಸಮಾಜದ ಮುಂದೆ ಇಡಬೇಕಾಗುತ್ತದೆ. ವಿವಿಧ ಧಾರೆಗಳು ಒಂದಾಗಿ ಹೊಳೆಯಾಗಿ ಹರಿಯಬೇಕಾಗಿದೆ. ವಿನಯಪೂರಿತವಾಗಿ ಶಠತ್ವವನ್ನು ಬಿಡಬೇಕಾಗಿದೆ. ಬಹುತ್ವ ಮತ್ತು ಒಕ್ಕೂಟ ವ್ಯವಸ್ಥೆಯನ್ನು ಉಳಿಸಿ ಕೊಳ್ಳಬೇಕಾಗಿದೆ. ನಾವು ಎಚ್ಚರಗೊಳ್ಳಬೇಕಾಗಿದೆ. ಆರ್ ಎಸ ಎಸ ನ ಕೂಗುಮಾರಿಗಳ ಗುಂಪು ನಮ್ಮ ಮನೆಗೆ ಬಂದಾಗ ಅದಕ್ಕೆ ಓ ಗೊಡದೆ “ ನಾಳೆ ಬಾ” ಎಂದು ಬರೆದಿಡಬೇಕು. ಬಿ ಜೆ ಪಿ ವಿರೋಧಿ ಶಕ್ತಿಗಳು ವಿನಯವಂತರಾಗಿ, ತಮ್ಮ ಸ್ವಯಂ ಶ್ರೇಷ್ಠತೆಯ ಅಹಂ ಬಿಡಬೇಕು. ಈ ಪ್ರಕ್ರಿಯೆಯಲ್ಲಿ ಬಿಜೆಪಿ ಯನ್ನು ವಿರೋಧಿಸುವ ಸಂಯುಕ್ತ ರಂಗವೊಂದು ರಚನೆ ಆಗಬೇಕು. ಒಂದು ಮಾತನ್ನು ನೆನಪಿನಲ್ಲಿ ಇಟ್ಟಿಕೊಳ್ಳಬೇಕು, ಅದೇನೆಂದರೆ -” ದ್ವೇಷ ಅಂತಿಮವಾಗಿ ಅದನ್ನು ಸೃಷ್ಟಿಸಿದವನನ್ನೇ ನಾಶ ಮಾಡುತ್ತದೆ.”

ದೇ ಮ ಅವರು ಈ ಕೃತಿಯಲ್ಲಿ ಯಾವುದೇ ಉಪದೇಶ ಮಾಡುತ್ತಿಲ್ಲ, ಬದಲಾಗಿ ತಮ್ಮ ಮನದಾಳದ ಮಾತನ್ನು ಹಂಚಿ ಕೊಳ್ಳುತ್ತಿದ್ದಾರೆ. ಅತ್ಯಂತ ಸರಳ ಭಾಷೆಯಲ್ಲಿ ಮುಂದೆ ಆಗಬೇಕಾದ್ದು ಏನೆಂದು ತಿಳಿಸುತ್ತಿದ್ದಾರೆ. ಅವರ ಸಾಹಿತ್ಯ ರಚನೆಯ ಪರಿಯೇ ಈ ರೀತಿಯದ್ದು. ಸಾಹಿತಿ ಮತ್ತು ರಾಜಕೀಯ ಕಾರ್ಯಕರ್ತರಾಗಿ ಹೇಳಬೇಕಾದ್ದನ್ನು ಹೇಳಿದ್ದಾರೆ.

ಸಂಚಾಲಕರು

ಆಖಿಲ ಭಾರತ ಪ್ರಜಾ ವೇದಿಕೆ. AIPF

# 5598. 5 ನೆಯ ಕ್ರಾಸ್ ವಿಜಯನಗರ ಎರಡನೆಯ ಹಂತ.

ಮೈಸೂರು -570017